मध्यनेपालमा सुटिङ भएको चलचित्र सतीदेवीको प्रिमियर सम्पन्न, मेयर पाण्डेद्वारा चलचित्रलाई सहयोग गर्ने प्रतिबद्धता

मध्यनेपाल (लमजुङ) । मध्येनपाल नगरपालिका, लमजुङका नगर प्रमुख रमेशकुमार पाण्डेले चलचित्र ‘सतीदेवी’ लाई सम्पूर्ण रूपले सहयोग गर्ने प्रतिबद्धता जाहेर गरेका छन् । लक्ष्मण सुवेदी लिखित, निर्मित तथा निर्देशित ‘सतीदेवी’ को बुधबार दमौलीको क्युएफएक्स सिनेमामा विशेष प्रदर्शनी गरिएको थियो । सो कार्यक्रमका प्रमुख अतिथि मेयर पाण्डेले मौलिक कथामा निर्माण गरिएको तथा सार्वजनिक प्रदर्शनअगावै देश–विदेशमा चर्चामा रहेको चलचित्र ‘सतीदेवी’ लाई सबैले साथ दिनुपर्ने धारणा राखे । 

‘हाम्रो मध्यनेपाल नगरपालिकाका विभिन्न स्थानमा छायाङ्कन गरिएको यस चलचित्रले निकै तारिफ पाइरहेको छ । देशको मौलिक कला, संस्कृति तथा कथालाई चलचित्रको माध्यमबाट विश्वसामु पु¥याउनु निकै सह्रानीय कार्य हो । आफ्नो माटोको सुगन्धलाई उजागर गर्ने ‘सतीदेवी’ टिमलाई हामी सबैले साथ, सहयोग र प्रेरणा दिनुपर्छ,’ मेयर पाण्डेले भने, ‘स्थानीयता, नेपालीपना, वास्तविकतामा मौलिक विषयवस्तुलाई उठान गर्ने जोकोहीलाई पनि सरकार र सम्बन्धित निकायले भरपुर सहयोग गर्नुपर्छ । यस चलचित्रलाई मध्यनेपाल नगरपालिका र मेरो व्यक्तिगत तवरले समेत यथाशक्य धेरै सहयोग गर्ने प्रतिबद्धता जाहेर गर्दछु ।’ उनले ‘सतीदेवी’ ले उठाएको नारीपक्षको मुद्दा निकै गहन र मननीय रहेको बताउँदै आफूलाई चलचित्र निकै मन परेको प्रतिक्रिया व्यक्त गरे ।

कार्यक्रममा ‘सतीदेवी’ को तर्फबाट निर्देशक सुवेदीले मेयर पाण्डे, वडा नं. ५ का अध्यक्ष ओमवीर गुरुङ, स्थानीय श्री सृजनशील एकता मगर समाज, लाफा गाउँ होमस्टे, कलाकार इभन जोशी, क्युएफएक्स दमौलीलगायतलाई आभार पत्र प्रदान गरेका थिए । अधिकांश दृश्य मध्यनेपाल नगरपालिकाका वडा नं. ५ लगायत विभिन्न स्थानमा खिचिएको र छायङ्कन तथा प्रवर्धनमा आफूहरूलाई निकै सहयोग मिलेकाले धन्यवादस्वरुप शो आयोजना गरिएको निर्देशक सुवेदीले बताए । 

विशेष प्रदर्शनी समारोहमा मध्यनेपाल नगरपालिका वडा नं. ५ का वडा अध्यक्ष ओमवीर गुरुङ, वडा नं. ३ का अध्यक्ष केशव न्यौपाने, वडा नं. ४ का अध्यक्ष रामबहादुर श्रेष्ठ, वडा नं. ७ का अध्यक्ष हिराबहादुर गुरुङ र वडा नं. ९ का अध्यक्ष महेशकुमार पाण्डेलगायत जनप्रतिनिधि तथा वडा नं. ५ स्थिति लाफा गाउँ होमस्टे, श्री सृजनशील एकता मगर समाजका प्रतिनिधिहरूका साथमा स्थानीयको बाक्लो उपस्थिति थियो । 

चलचित्र हेरेपछि सतप्रतिशत दर्शकले उत्कृष्ट प्रतिक्रिया दिएका थिए । वडा नं. ५ का अध्यक्ष गुरुङले ‘सतीदेवी’ आफूलाई अत्यन्तै राम्रो लागेको बताउँदै यस प्रकारका मौलिक, वास्तविक स्थिति छर्लङ्ग पार्ने विषयका चलचित्र अझै धेरै बन्नुपर्ने धारणा राखे । खैरिनीटारका स्थानीय मिनबहादुरले ‘सतीदेवी’ अहिलेसम्म निर्माण भएका नेपाली चलचित्रमध्ये उत्कृष्ट लागेको प्रतिक्रिया दिए भने दमौलीका एक दर्शकले छोराछोरीबिच हुने गरेको बिभेदको अन्त्य गर्न यो चलचित्रले ठूलो भूमिका खेल्ने दावी गर्दै यो चलचित्र सारा बिश्वले हेर्नुपर्ने धारणा राखे । एक युवती दर्शकले ‘सतीदेवी’ हेर्दा आफू २०–२२ ठाउँमा भक्कानीएर रोएको बताउँदै अबका दिनमा म छोरी मान्छे हुँ भनेर कमजोर मानसिकता नराख्ने र आफ्नो परिवारका लागि जस्तोसुकै सङ्घर्ष गर्न पनि पछि नहट्ने प्रतिबद्धता व्यक्त गरिन् । बच्चादेखि वृद्धसम्म उपस्थित भएको शोमा चलचित्र हेरेका अधिकांश दर्शक आँशु पुछ्दै हलबाट बाहिरिएका थिए । कतिपयले चलचित्रमा आफ्नो परिवारकै कथा ठ्याक्कै मिलेको बताउँदै यत्तिको यथार्थपरक चलचित्र पहिला कहिल्यै हेर्न नपाएको प्रतिक्रिया दिएका थिए ।

गत माघ तेस्रो साता सौराहामा सम्पन्न सौराहा दक्षिण एसियाली चलचित्र महोत्सवमा सर्वाेत्कृष्ट चलचित्र र शिव रेग्मी सर्वाेत्कृष्ट चलचित्र निर्देशक अवार्ड जितेको ‘सतीदेवी’ को चर्चाप्रति केही दिनअघि सूचना तथा सञ्चारमन्त्री रेखा शर्माले चासो देखाएकी थिइन् । निर्देशक सुवेदी सञ्चार मन्त्रालय पुगी मन्त्री शर्मालाई आफ्नो चलचित्रबारे विस्तृत जानकारी प्रस्तुत गरेका थिए । मन्त्री शर्माले ‘सतीदेवी’ लाई सरकारी तवरबाट समेत सकेको सहयोग गर्ने प्रतिबद्धता जाहेर गरेकी थिइन् । 

दिलासा क्रिएसनले गोल्डेन स्टेट मुभी मेकर्स एलएलसी क्यालिफोर्नियासँगको सहकार्यमा निर्माण गरेको चलचित्र पछिल्लो समय निकै चर्चामा छ । दिलासा, सारा र श्रीदेवी सुवेदी निर्माता रहेको चलचित्रमा मलिका महत, हर्षिका वली, मञ्जिला बानियाँ, कुलबहादुर अधिकारी, रमेश बुढाथोकी, सृजना अधिकारी, सन्दिपबाबु लोहनी, सुजीता शिवाकोटी, भोला सापकोटा, मनिषा सापकोटा, सन्देश लिम्बूलगायतका कलाकारले अभिनय गरेका छन् । चलचित्रको स्वदेश प्रदर्शन मिति केही समयमै तोकिने जानकारी निर्देशक सुवेदीले दिएका छन् ।