रूपामा वाङ्मय प्रतिष्ठान स्थापना हुँदै

 

पोखरा । रूपा गाउँ-पालिका स्थायी ठेगाना भई विभिन्न भूभागमा बसोबास गर्ने सम्पूर्ण कला साहित्य तथा संगित प्रेमीहरुलाई  साहित्यिक सञ्जालमा आबद्ध गरी संस्थागत गर्ने उद्देश्यले 'रुपा वाङ्‌मय प्रतिष्ठान' को स्थापना हुने भएको छ ।

रूपा गाउँपालिकाभित्रका साहित्य, कला तथा संगितमा लागेका व्यक्तिहरुको भेलाले रुपा वाङ्मय प्रतिष्ठान गठन गर्ने उद्देश्यका साथ आज आदर्श पोखरेलको संयोजकत्वमा रुपा वाङ्मय प्रतिष्ठान तदर्थ समिति गठन गरेको छ । २१ सदस्यीय उक्त समितिमा सह संयोजक मदन मल्ल ठकुरी तथा सचिवमा मदन घिमिरे चयन भएका छन् ।  उक्त समितिले ३ महिनाभित्र संस्था दर्ता प्रकृया तथा साधरण तथा आजीवन सदस्यता वितरण गरी अधिवेशन सम्पन्न गर्नेछ । रुपा गाउँपालिका भित्र रहेका कला, साहित्य, संगित तथा वाङ्‌मय क्षेत्रमा रहेका मानिसहरुलाई एउटै सस्थामा आवद्ध गराउने, रुपा गाउँपालिकाभित्र विद्यालय तहदेखि नै साहित्य, संगित तथा कला सम्बन्धी कार्यक्रम सञ्चालन गर्ने र रू‌पा गाउँपालिकाभित्र साहित्य कला तथा संस्कृतिको संरक्षण र संवर्धनमा सहयोग गर्ने उद्देश्यले यो संस्था गठन गर्न लागिएको संस्थाका तदर्थ समिति संयोजक आदर्श पोखरेलले जानकारी दिनुभयो ।